Eavesdropping - Sayang Isang Dagli

Sayang - Isang Dagli

Ni Lawrence Avillano

May naguusap sa kadiliman. Paguusap na tumapos sa isang mahabang katahimikan. Sinimulan ito sa buntong-hininga.

Mahaba….

 Mariin….

"Nailigtas ko ang isang bituin sa pagbulusok" sabi ng unang tinig. Pagkatapos bumuntong hininga ulit.

"O eh. Bakit tila nababagabag ka? Dapat kang magsaya. Hindi lahat kayang magligtas ng bituin." sabi naman ng isang tila natatawa.

"Masaya nga ako para sa kanya. Para sa akin at para sa kalawakan na nagmamay-ari sa kanya." Mahina ang sagot. May pagkabalisa

"Oh e ano ngang problema bakit ganyan ka? Magsaya ka at patuloy mo siyang mamamasdang kumikinang." Ang bahagyang pagtaas ng tinig ay kapansin-pansin. Siguro ay naiinis na rin.

"Para ka namang bago nang bago. Alam mo naman na ang istoryang ito"
Sabi ng unang tinig

"Haha! Yan na lang palagi ang dahilan mo sa tuwing ika'y naririto. Ano nga 'yon? Nais kong matanto." May bahagya nang tuwa. Hindi ko alam kung bakit.

"Nailigtas ko ang isang bituin sa kanyang pagbulusok ngunit pagkatapos ng lahat-lahat ako ang nahulog."

Katahimikan....

(bawal maginsert ng huni ng kuliglig wala non sa kalawakan)

"Sawi! Ahahaha!" Paunang sabi ng pangalwa. Bago mahinang-mahinang idinugtong niya "Para kang tanga na nagpakahulog pa. Naririto akong kusang bumaba para makasama ka."

"Ano? Para ka na namang kuliglig!" tila naiinis pang sabi ng unang tinig. Bago mahinang-mahinang idinugtong din "Alam ko naman. Natatakot lang akong magwakas din tayo sa kawalan"

Mahabang katahimikan ulit. 

Ako lang yata ang nakarinig sa dalwa.

"Shhhhh... wag kayong maingay ha?"

Sa Pagibig Kong Walang Pangalan

Sabi mo

Ang pagibig ay isang pangalang walang pagkakakilanlan
Kaya pala alam ko ang pangalan mo pero hindi kita kilala
Alam ko ang pangalan mo
Hinahanap kita sa yong mga kaibigan
Sa nanay mo
Sa tatay mo
Sa listahan ng nalilito
Nababasa ko ang iyong pangalan
Alam kong ikaw yon
Ngunit
Hindi ko pala alam
Kung sino ang ikaw
Sinilip lang kita sa siwang ng iyong mga ngiti
Sa mga siwang kung saan ako nahulog
Kilala ko lang ang tunog ng yong halakhak
Kung saan ako nalunod
Kilala ko ang kislap ng yong mga mata
Kung saan ako natakot
Natakot na mawala ka pa
Na makawala ka pa
Pero mali ako
Hindi pala kita kilala
Hindi pala kita nakilala
Hindi pala
Marami ka palang likod
At hindi ka humarap sa akin kailanman
Pero mahal kita
Mahalaga ka
May halaga ka
Kahit hindi naman pala talaga kita kilala
Handa akong mamatay sa talim ng iyong punyal
Sa tuwing sinasaksak mo ako sa aking likuran
Saksakin mo ako
Hanggang maubos ang tibok ng puso kong matagal ko nang isinuko sayo
Pagibig kong may mahiwagang pangalang walang pagkakakilanlan

A Love Triangle

Ang Dagat Ang Ulan At Ang Langit - Tatsulok na Pagibig

Nang minsan silang magkita

Sa isang lugar na tahimik;

Tinanong ng dagat ang ulap
Kung bakit
Labis niyang mahal ang langit---
`Ewan ko`
Ang tangi nitong banggit
Ngunit sa dagat ay 'di makatitig
At mahinang-mahinang sinambit;
Mahuhulog din ako sayo
Kapag ngalay na sa pagkapit
Itong dagat na ang puso'y natigatig
Sa akalang lubos nang wasak ang pagibig
Hindi na nakinig
Nagpakalunod na agad
Sa sariling tubig

"Ana D. Plosis"

Nais kong hulihin mga bitwin sayong mata

mata na salamin ng ligayang nadarama
nadarama na pagibig hindi akin kundi kanya
kanya sa dahilang tayong dalwa'y malabo na

Ngunit giliw kahit ganon sa labi ko ay may ngiti
ngiti na nagmula sa puso ko na palagi
palagi nang para sa yo'y may hiling sa pintakasi
pintakasi nitong pusong sa pagibig mo ay sawi

Sa 'king labi ay nunukal ang ang taimtim na dalangin
dalangin kong ligaya mo'y makamit sa kanyang piling
piling ng iyong sintang palagay mo'y higit sa 'kin
Aking pagmamahal hindi pa rin magmamaliw

Aking hirang mahal kita langit ako'y isumpa man
isumpa man na mundo ko'y magdilim na habang buhay
buhay na pangako kong hanggang huli sayo alay
alay na tinapon mo't niyurakang anong husay

©Lawrence Avillano

Anadiplosis

A form of poetry

 #lawrenceavillano
#flashfiction

Paghikbi at Paghibik

Sa gabing pipi
maging ang mga kuliglig
Kausap ko ang dingding
ang aandap-andap na ilaw
nais bigyang linaw
ang pagiisa at mga hinaing
ngunit ang tugon nila'y katahimikan din
katahimikang siya mong hiniling
kaya kausap ko ngayon
ilaw at dingding
sa gabing pipi
maging ang mga kuliglig

Sa mga gabing ang langit ay madamot sa ulap
kinakausap ko ang mga bitwin
sa mga bulalakaw
Humihiling
ngunit napagtanto kong
sila at ikaw
ay di magkaiba
malayo
maganda
ngunit bingi
sa 'king hiling
sa mga gabing ang langit ay madamot sa ulap

Lawrence Avillano 2016

"Pagdiklom"’

Nagaabang
pinupulsuhan ang tinta
walang tibok ang papel
nagaabang
sa unang guni
nang unang guri
tungkol sa 'yo
sa akin
sa ulan
sa kanina
o bukas kaya
ngunit
walang pulso ang tinta
walang tibok ang papel
parang ako't ikaw
tinadhana
magkapares
ngunit
walang pulso
walang tibok

Lawrence Avillano 2016
Mula sa - "Guri-guring Pagibig"

Dag-im

"Dag-im"

Ang layu-layo mo.

Tinangka kitang lapitan

At napaso ako

Sa init ng sarili kong pagmamahal.

Sagad sa kaluluwa ang lamig mo at pait,

 Parang bagong bukas na beer:

Malamig,

 Mapait.

Hinahanap-hanap ko.

Ang layu-layo mo,

Ngunit ginawa kong lahat

 Upang ika'y malapitan.

Umaasa akong nasa akin

Ang huling pirasong bubuo sa'yo.

Hindi pala:

Libu-libong bahagi pala ang nawala sa'yong pagkabasag.

At ngayon,

Pareho na tayong wasak

At may malalalim na sugat.

Tinangka kitang lapitan, mahal,

Sa sarili mong mundo—

Mundong binuo mula sa luha.

Ninais kong makisalo

Sa hinagpis mo't pait.

Ngunit, mahal,

Patuloy na bumabalong ang 'yong luha,

Hindi mula sa mata Kundi mula sa apdo at sa puso mong nalason

Nang kamandag ng unang pag-ibig.

Mahal kita

Kaya hindi na ako lalayo,

Kahit alam kong mauuna pa akong malulunod

Sa mundo mong hilam sa luha.

Mahal,

Hindi ko sasabihin sa'yong

Gumising ka na

Sa kabaliwan,

Dahil ako'y tulad mo ring baliw

Mula pa noong

 Una kong hakbang palapit sa'yo.

-         Lawrence Avillano; August 18, 2016

Tulang Tagalog: Singhot

Singhot is a tagalog word meaning sniff or to sniff
Kadalasang sumisinghot tayo kapag sinisipon pero pwede din natin singhotin ang mababango at kaanis-nais na amoy. Pwede rin nating singhotin ang utot para maubos.

Ang tulang ito ay nasulat matapos akong makakita ng mag-siyotang nagsisinghutan sa Pation ng San Diego de Alcala Cathedral sa Gumaca Quezon.

So here it is:

"I don't dream at night, I dream all day." - Steven Spielberg

"SINGHOT"

Nakatutuwang isispin

Kung paanong natangay ako

ng simple mong bango

pabalik

Sa mga lugar

Na malaon nang binago ng panahon

Ngunit nanatili

Sa sulok

ng madilim kong puso

hinalukay

ang magulo kong isipan

ibinalik

ang mga lumang larawan

na inakala kong

matagal ko nang nalimot

ininis

ang bawat sapot ng damdamin

upang muling tumawa

lumuha

ngumiti

sa kabila ng bawat pangigipit

ng tadhana

Binuhay

Ang ala-ala

Ang ikaw at akong

muntik nang napabayaan

pangakong muntik nang nawala

Sa prayoridad

Sa buhay

At higit sa lahat

Hinango ako

Ng iyong bango

Mula sa mga araw

Oo sa araw-araw

Na hindi ko maramdaman

Ang buhay

hinihila ako

ng simple mong bango

patungo

sa natatagong ligaya

na ipinagdaramot ng buhay

Sa kakaibang lukso

ng puso

na tanging sa panaginip ko

nakilala

Salamat

Nais ko sana

Palagi kang singhotin

Kaya lang

Hindi ka akin

Ngunit

Kung magiging akin ka

Aamoyin kita

Hanggang pareho na tayong amoy lupa

at kung hindi naman

sigurado ako

araw-araw kitang mapapanaginipan

Pag-ibig

Itong pagibig ay tunay ngang kakatwa
Upang maging isa kailangan ay dalawa
Ito`y dalwang pusong liglig sa pagsinta
Dalwang kaluluwang ang diwa ay isa

Dalwang mga pusong tibok ay pareho
Masayang umaawit pagka`t magkatono
Dalwang kaluluwang kapag pinaglayo
Kahit ang Disney Land magiging impyerno

Ngunit may pag-ibig na nakapagtataka
Tanging iisa lang itong sumasamba
Ito`y palagi nang puspos ng dalita
At ang tanging sigaw "giliw mahal kita"

Ganyan ang pagibig ng baliw na puso
Na di nagsasawang sa sintay sumamo
"Oh giliw ikaw lang ang sinasamba ko
mula kaluluwa hanggang patay na kuko!"

Lawrence Avillano
January 27, 2015