"Mga bayani; Sino sila?"

Lawrence Avillano

Mga bayani silang pagibig ay lubos

Sa abang bayan na dusa ay taos

Mula sa pagyasak at pagkabusabos

Ay tibok ng pulso ang ipinantubos

Sila itong mga walang ibang hangad

Kundi ang sa gapos ng dayo'y kumalag

Sa kanyon at riple ay hindi naduwag

kahit armas nila ay dulos at libag

Sila itong mga hindi nangabulag

Sa madayang kinang ng ginto at pilak

Wala mang malamon sa mumunting hapag

Hindi naging taksil sa lupaing liyag

#poetrymonday

#arawngmgabayani

#nationalheroesday

Tulang Tagalog: Tubigan

"Tubigan - Larong Pambata"

Ano ang Tubigan?

Ang Tubigan ay isang katutubong laro ng mga Pilipino na may anim hanggang walong manlalaro.Kilala rin ito sa tawag na Patintero.

Isinasagawa ito sa daan na ginuhitan (gamit ang chalk o uling) ng patayo at pahalang oupang makabuo ng parihaba o rectangle.

Ang mga manlalaro ay hahatiin sa dalawang grupo na may tatlo o apat na miyembro ang bawat isa. Pinipili ang bawat miyembro sa pamamagitan ng Pompyang (maiba taya), 

sawsaw suka o bato-bato pick (jack en poy). Pagkatapos ay maglalaban ang dalawang pipiliing lider sa bato-bato pick o tao-ibon at ang matalo ang siyang taya.

Ang miyembro ng matatayang grupo ay tatayo sa mga parihabang guhit. Ang nasa

unang guhit o harap ay tinatawag na “patoto”. Ang Patoto ang tumatayong lider na siya lamang may karapatang manghuli o humila sa mga dadaan sa patayong gitnang linya

(parang vertical median na naghahati sa parihaba) na tumatawid sa tatlong pahigang

linya.

Ang miyembro ng nanalong grupo ay kailangang tumawid sa mga guhit papasok mula

sa harapang guhit hanggang sa pangatlo o huling guhit at makabalik palabas mula sa

huling guhit pabalik sa harap ng hindi nahuhuli o nahahawakan ng mga taya.

Upang hindi magtagal ang laro bumibilang nang hanggang sampu ang mga taya at kailangang tumawid na ang nanalong grupo bago matapos ang bilang. Kung 

makukulong sa loob ng guhit ang lahat ng miyembro ng nanalong grupo, bibilang ng hanggang pito ang mga taya at sa loob ng pitong bilang kailangang may makalabas 

kahit isa sa mga nakulong. Kung hindi maangkop sa mga patakaran maari nang mataya 

ang kabilang grupo.

Narito ang tulang nabuo matapos kong panoorin ang mga batang nagsisipaglaro ng 

patintero at ikumpara sa buhay ng tao ang laro.

"TUBIGAN"

isa dalwa tatlo 

tawid bawal maiwan

apat lima anim 

bilis baka abutan

pito...

Pitong nagbabagang guhit

walo hanggang sampu

tuloy-tuloy baka madagit

akala ko nuon tubigan ay laro lang

nitong mga naiinip na kabataan

ngunit nang ako'y magising kinabukasan

itong laro pala'y katotohanan

ang 'tubigan pala ay buhay ng tao

palagi kang taya kung di ka tatakbo

hihilahin o kaya'y itutulak ka ng iba

kapag mabilis naman ay titisurin ka

kaya naman sa larong 'tubigan

kailangang kumilos kaibigan

at nang hindi naman palaging ikaw

ang humahabol at tinatawanan

-Lawrence Avillano

#SAF44

Sa inyo Sir Anak Kuya Itay Tito Bunso
na pumanaw para sa bayang ito
kayo samin ngayon ay bayaning bago
narito ang tula bilang pagsaludo

Anak..
Hindi kita malilimutan
mula sa pagyakap sa sinapupunan
ipagmamalaki ko habang nabubuhay
ikaw ay pumanaw ng dahil sa bayan

Kuya...
Ikaw na sa akin ay nakatatanda
naging huwaran ka nitong pagkabata
bakit sa paglisan ang loob ko`y sasama?
ika`y bayani na nitong imbing bansa

Itay..
Ikaw itong aming tanging sandigan
na nagpapatibay sa ating tahanan
ngayo`y nariyan ka sa huling himlayan
Ito`y nang dahil sa pag-big sa bayan

Tito...
Naalala ko pa ang mga payo
habang ikaw ay kalaro ko
na wala nang hihigit pa sa pagsusundalo
ngayon inaawit ang pambansang himno
para sayo...

Bunso...
Lubos itong aming paghihinagpis
kung para sa iyo lahat na`y tiniis
ngayon luha namin ay namamalisbis
di ka na babalik mula nang umalis

Sir!
Tagapagpatupad ng kaayusan
tagapagtanggol ng bayan
sa pagkamatay nyo ako`y sinilaban
ilang buhay pa kaya ang wawakasan
alang-alang sa kapayapaan

Sir!
ang kisalap ng watawat ngayo`y walang ningning
ang bituin at araw niya ngayon ay nagdidilim
sapagkat lupa ng araw ng luwalhati`t pagsinta
ay nagluluksa ng dahil sayo...

lawrence Avillano
Sinulat para sa mga bayani ng #MamasapanoMasacre